itnā to huā ai dil ik shaḳhs ke jaane se
bichhḌe hue milte haiñ kuchh dost purāne se
ik aag hai jañgal kī rusvā.ī kā charchā hai
dushman bhī chale aa.e milne ke bahāne se
ab merā safar tanhā ab us kī judā manzil
pūchho na pata us kā tum mere Thikāne se
raushan hue vīrāne ḳhush ho ga.ī duniyā bhī
kuchh ham bhī sukūñ se haiñ ghar apnā jalāne se
rusvā.ī to vaise bhī taqdīr hai āshiq kī
zillat bhī milī ham ko ulfat ke fasāne se