mere jaise ban jāoge jab ishq tumheñ ho jā.egā
dīvāroñ se sar Takrāoge jab ishq tumheñ ho jā.egā
har baat gavārā kar loge minnat bhī utārā kar loge
ta.avīzeñ bhī bañdhvāo.ge jab ishq tumheñ ho jā.egā
tanhā.ī ke jhūle kholeñge har baat purānī bhūleñge
ā.īne se tum ghabrāoge jab ishq tumheñ ho jā.egā
jab sūraj bhī kho jā.egā aur chāñd kahīñ so jā.egā
tum bhī ghar der se aaoge jab ishq tumheñ ho jā.egā
bechainī baḌh jā.egī aur yaad kisī kī aa.egī
tum merī ġhazleñ gāoge jab ishq tumheñ ho jā.egā