Saeed Rahi

ye haqiqat hai ki hota hai asar baaton mein

Saeed Rahi

ye haqīqat hai ki hotā hai asar bātoñ meñ
tum bhī khul jāoge do chaar mulāqātoñ meñ
tum se sadiyoñ kī vafāoñ kā koī naata thā
tum se milne kī lakīreñ thī mire hāthoñ meñ
tere va.adoñ ne hameñ ghar se nikalne na diyā
log mausam kā maza le ga.e barsātoñ meñ
ab na sūraj na sitāra hai na sham.a hai na chāñd
apne zaḳhmoñ kā ujālā hai ghanī rātoñ meñ
Top Urdushayar.com