tū samajhtā hai to ḳhud terī nazar gahrī nahīñ

varna buniyād-e-ḳhizāñ ai be-ḳhabar gahrī nahīñ

vasl-e-shīrīñ hai na jū-e-shīr hai tere nasīb

zarb ai farhād teshe kī agar gahrī nahīñ

ye bhī mumkin hai ki ḳhud terī navā ho narm-ḳhez

niiñd logoñ kī to ai murġh-e-sahar gahrī nahīñ

zindagī kī aaj qadreñ haiñ faqat gamloñ ke phuul

un meñ ra.anā.ī hai jaḌ un kī magar gahrī nahīñ

ham ne un āñkhoñ meñ akasr jhāñk kar dekhā 'sharīf'

koī shai marmūz itnī is qadar gahrī nahīñ