har mulāqāt meñ lagte haiñ vo begāne se
fā.eda kyā hai bhalā aisoñ ke yārāne se
kuchh jo samjhā to mujhe sab ne hī āshiq samjhā
baat ye ḳhuub nikālī mire afsāne se
zindagī apnī nazar aane lagī sirf sarāb
kabhī guzre jo dil-e-zār ke vīrāne se
ek pal bhī na Thahar pāoge ai sañg-zano
koī patthar kabhī lauT aayā jo dīvāne se
tum ko marnā hai to marnā mire gul hone par
sham.a kahtī rahī shab-bhar yahī parvāne se
phir na dekhā tujhe ai 'josh' sukūñ se baiThā
jab se uTThā hai tū is shoḳh ke kāshāne se