maiñ tum ko soch rahā huuñ magar udaas nahīñ
tū ābshār-e-sukūñ hai badan kī pyaas nahīñ
binā chhue hī mire ḳhvāb chuum letā ho
bahut qarīb ho hālāñki mere paas nahīñ
ḳhizāñ kī rut meñ bhī ḳhushbū sambhāl rakkhī hai
maiñ tum se duur huā huuñ magar udaas nahīñ
qarīb aan ke baiTho magar gale na lago
davā jo dil ke liye hai badan ko raas nahīñ
rañgoñ meñ ḳhuun kī mānind hai ravāñ mujh meñ
tū andarūn-e-badan hai mirā libās nahīñ
qarār-e-tarq-e-ta.alluq thā so nibhāyā bhī
sharāb chhoḌ dī maiñ ne magar gilās nahīñ