hairān huuñ ki aaj ye kyā hādisa huā

hai aag sard dil bhī hai merā bujhā huā

manzil pe pahle merī rasā.ī huī to phir

har naqsh-e-pā se aage mirā naqsh-e-pā huā

rekhā.eñ haath kī to sivā jāgtī raheñ

ai kaash merā baḳht rahe jāgtā huā

thī us kī band muTThī meñ chiTThī dabī huī

jo shaḳhs thā train ke nīche kaTā huā

'nayyar' kahānī yaad hai pariyoñ ke desh kī

maiñ us tilism se na abhī tak rihā huā