raaz ye mujh pe āshkārā hai

ishq shabnam nahīñ sharārā hai

ik nigāh-e-karam phir us ke ba.ad

umr bhar kā sitam gavārā hai

raqs meñ haiñ jo sāġhar-o-mīnā

kis kī nazroñ kā ye ishārā hai

aisī manzil pe aa gayā huuñ jahāñ

tire ġham kā hī ik sahārā hai

lauT aa.e haiñ yaar ke dar se

vaqt ne jab hameñ pukārā hai

dil na TuuTe to zarra-e-nāchīz

kīmiyā hai jo paarā paarā hai

jām-e-rañgīñ meñ un kā aks-e-jamāl

yā shafaq meñ koī sitārā hai

naav TukḌe huī hai tūfāñ se

ab to murshid kā hī sahārā hai

ishq karnā hai maat khā jaanā

us meñ jiitā huā bhī haarā hai

apne darshan pe ik nigāh-e-karam

vo ġham-e-zindagī kā maarā hai