tire bāzuoñ kā sahārā to le luuñ magar in meñ bhī rach ga.ī hai thakan
maiñ sahrā se bach kar chaman meñ to aa.uuñ pa sahrā se kuchh kam nahīñ ye chaman
mirī ziist kī raah tārīk thī chāñd ban kar tum aa.e to raushan huī
ye rah aaj phir tīra-o-tār hai ġhāliban chāñd ko lag gayā hai gahan
har ik samt nāgin kī sūrat lapaktī huī tīrgī se hirāsāñ na ho
ajab kyā ki lau de uThe mere lams-e-farozāñ se terā sulagtā badan
ye ashkoñ se bhīgī huī muskurāhaT muravvat kā e.ajāz hai varna ham
ġhamoñ kī havāoñ meñ uḌtā huā dekh kar aa rahe haiñ koī pairahan
firāq-e-lab-o-zulf par munhasir kam hī paa.ī hai ahl-e-vafā kī taḌap
tum āġhosh ke tañg halqe meñ ho phir bhī har lamha afzūñ hai dil kī jalan
mire pyaar ko ik na.e moḌ par dekh kar yuuñ mirī jaañ ta.ajjub na kar
badalte rahe haiñ badalte raheñge zamāne ke hamrāh dil ke chalan