koī subūt na hogā tumhāre hone kā
na aayā fan jo qalam ḳhuun meñ Dubone kā
har ek baat pe bas qahqahe baraste haiñ
ye tarz kitnā nirālā hai dil ke rone kā
shurū tum ne kiyā thā tumheñ bhugatnā hai
jo silsila thā ġhalat-fahmiyoñ ko bone kā
shanāḳht ho to ga.ī apne aur parā.e kī
nahīñ hai ġham mujhe umr-e-azīz khone kā
'ra.īs' fikr-e-suḳhan raat bhar jagātī hai
koī bhī vaqt muqarrar nahīñ hai sone kā