ai be-dilo harīf-e-shab-e-tār kyuuñ hue
kachchī agar thī niiñd to bedār kyuuñ hue
sahrā ko aaj kostī phirtī haiñ āñdhiyāñ
dīvāne gulistāñ ke taraf-dār kyuuñ hue
sust-e.atibāriyoñ ko nahīñ tāb-e-intizār
va.ade sahar ke sarf-e-shab-e-tār kyuuñ hue
sharmā gayā chaman meñ tabassum bahār kā
ham gul-farosh zaḳhm-e-dil-e-zār kyuuñ hue
kyā gulsitāñ meñ thī safar-āmāda bū-e-gul
jhoñke havā ke qāfila-sālār kyuuñ hue
ai zindagī naqāb ulaT kar javāb de
fan ham se pūchhtā hai ki fankār kyuuñ hue