gard meñ aT rahe haiñ ehsāsāt
dhīme dhīme baras rahī hai raat
jal uThā ik charāġh-e-shām to kyā
bujh ga.e be-shumār imkānāt
haa.e maazī kī dil-nashīñ yādeñ
haa.e ḳhuñḳhār bheḌiyoñ kī barāt
chyūñTiyāñ jaise zehan par reñgeñ
uf ye mere latīf ehsāsāt
bhuut ban kar mujhe Darātī rahīñ
merī nā-āfrīda taḳhlīqāt
kaun aayā mire ta.āqub meñ
vahī fikr-o-ḳhayāl ke jinnāt
daf.atan kis ne qahqaha maarā
ye añdhere meñ kaun hai mire saat
sarsar-e-shab kahāñ ki pattoñ meñ
karb-e-ġham se karāhtī hai hayāt
mujh se mujh ko na chhīn kar le jaa.e
shāhzādī-e-kishvar-e-zulmāt
sub.h jaagā to yaad bhī na rahā
raat thī chāñdnī ki chāñdnī raat
tūda-e-reg o naḳhl-e-ḳhushk-e-chīnār
chhup ga.ī kis kī oT meñ barsāt
ye daraḳht-e-kuhan lisān-ul-ġhaib
aur ye shāḳh-e-ḳhushk barg-e-nabāt
kyā yahī hai 'ra.īs'-amrohvī
uḌ ke aa.e haiñ duur se zarrāt