kahīñ pe hijr kā dukh hai kahīñ visāl kā dukh

mirī jabīñ pe huā sabt har malāl kā dukh

mujhe ye Dar hai kahīñ ḳhud-kushī na kar lo tum

tumhārī ziist meñ aayā agar zavāl kā dukh

vo ik savāl ki jis kā javāb de na sake

hanūz kāTtā rahtā hai is savāl kā dukh

usī kī yaad meñ guzregī zindagī merī

jo jaate jaate mujhe de gayā kamāl kā dukh

hamārī aañkh kī putlī meñ ashk kī sūrat

chamak rahā hai kisī shahr-e-be-misāl kā dukh