kaash mil jaa.e ham-mizāj koī

mere ġham kā bhī ho ilaaj koī

jaag kar raat jab guzārnī ho

DhūñD letā huuñ kām-kāj koī

andar aane kā dar to band huā

kaise dil par karegā raaj koī

dosto vaqt kī zarūrat hai

phir banā.eñ nayā samāj koī

ma.azarat chāhte haiñ milne se

yaad aayā huā hai aaj koī

chup kā taalā lagā ke hoñToñ par

kartā rahtā hai ehtijāj koī

iḳhtiyār is qadar to ho 'fā.ez'

Daal jaa.eñ nayā rivāj koī