mujh se mil kar ḳhud ko kyā pā.egā tū
aur tanhā ho ke rah jā.egā tū
ye ThiThurtī dhuup hai is dhuup meñ
kaise apnā ḳhuun garmā.egā tū
haDDiyoñ kā dard piinā hai to pī
varna saarī umr pachhtā.egā tū
saañp ke bil meñ na kar amrit talāsh
yuuñ to ḳhud ko bhī gañvā aa.egā tū
terī parchhā.īñ simaTtī jā.egī
jaise jaise phailtā jā.egā tū
terā patthar jism ho jā.egā chuur
jab kisī shīshe se Takrā.egā tū
yuuñ na ghoñT un sañg-rezo ke gale
ḳhud shikār-e-sañg ho jā.egā tū