paikar-e-nāz pe jab mauj-e-hayā chaltī thī
qarya-e-jāñ meñ mohabbat kī havā chaltī thī
un ke kūche se guzartā thā uThā.e hue sar
jazba-e-ishq ke hamrāh anā chaltī thī
ik zamāna bhī chalā saath to aage aage
gard uḌātī huī ik mauj-e-balā chaltī thī
parda-e-fikr pe har aan chamakte the nujūm
farsh tā arsh koī māh-liqā chaltī thī
maiñ hī tanhā na ḳharāboñ se guzartā thā 'na.īm'
shaam tā sub.h sitāroñ kī ziyā chaltī thī