rashk apnoñ ko yahī hai ham ne jo chāhā milā

bas hamīñ vāqif haiñ kyā māñgā ḳhudā se kyā milā

jis zamīñ pe merā ghar thā kyā mahal uTThā vahāñ

maiñ jo lauTā huuñ to ḳhāk-e-dar na ham-sāya milā

dekhiye kab tak mile insān ko rāh-e-najāt

laakh barsoñ meñ to vīrāñ chāñd kā rasta milā

har safar ik aarzū hai varna sair-e-dasht meñ

kis ko shahzādī milī hai kis ko shahzāda milā

sab purāne daaġh dil hī meñ rahe āḳhir 'na.īm'

har na.e dukh meñ na pichhle dukh se chhuTkārā milā