ruḳh se naqāb un ke jo haTtī chalī ga.ī
chādar sī ek nuur kī bichhtī chalī ga.ī
aa.e vo mere ghar pe to jaane ye kyā huā
har ek chiiz ḳhud se nikhartī chalī ga.ī
guzrā jidhar jidhar se mirā pyaar dosto
ḳhushbū udhar havāoñ meñ ghultī chalī ga.ī
aa.ī bahār ab ke chaman meñ kuchh is tarah
gul kī har ek shāḳh lachaktī chalī ga.ī
'tauqīr' kar chukā thā samundar se dostī
kashtī bhañvar se us kī guzartī chalī ga.ī