raunaq hī nahīñ us kī ham rūh-o-ravāñ bhī haiñ
lekin hameñ duniyā kī ḳhātir pe garāñ bhī haiñ
ik tere hī kūche par mauqūf nahīñ hai kuchh
har gaam haiñ ta.azīreñ ham log jahāñ bhī haiñ
gulchīñ ko nahīñ shāyad is raaz se āgāhī
shabnam meñ nahā.e gul sho.aloñ kī zabāñ bhī haiñ
khāte the qasam jin ke kirdār-o-amal kī ham
shāmil saf-e-a.adā meñ vo ham-nafasāñ bhī haiñ
sach kahte ho ham aise zarroñ kī haqīqat kyā
ab kaun kahe tum se ham sañg-e-girāñ bhī haiñ