jā.ūñ kyā muñh le ke maiñ vo bad-gumāñ ho jā.egā
rañg ke uḌne se ishq us par ayaañ ho jā.egā
aish-e-bazm-e-be-ḳhudī josh-e-fuġhāñ ho jā.egā
ham kahāñ hoñge jo rāz-e-ġham ayaañ ho jā.egā
dūsrā aalam bane to ho sake taskīn-e-husn
ab hai jitnā ye to sarf-e-imtihāñ ho jā.egā
tā-ajal pahuñchā.egī ye nā-tavānī hijr meñ
zo.af baḌhte baḌhte zor-e-nā-tavāñ ho jā.egā
merī ḳhāmoshī ko zālim jor-e-be-jā se na chheḌ
varna zabt-e-dil tirī zid se fuġhāñ ho jā.egā
shauq se ġhairoñ meñ jaa.e maiñ na hūñgā bad-gumāñ
ḳhū-e-bad se ḳhud vo apnā pāsbāñ ho jā.egā
dil-nashīñ hai ālam-e-zauq-e-asīrī kā ḳhayāl
ab dil-e-sayyād apnā āshiyāñ ho jā.egā
ġham se mere ghar meñ gunjā.ish nahīñ hai aish kī
naġhma-ḳhvāñ bhī aa.egā to nauha-ḳhvāñ ho jā.egā
mausam-e-bārāñ meñ kyuuñ hai dasht kā qasd ai junūñ
āj-kal to dasht apnā hī makāñ ho jā.egā
ḳhūbi-e-guftār se samjhegā kaun us kā javāb
hashr saarā mahv-e-andāz-e-bayāñ ho jā.egā
kyā yaqīñ thā ham jo pahuñcheñge vahāñ ai josh-e-ashk
vahm apnā baḌh ke us kā pāsbāñ ho jā.egā
kah sakegā kuchh bhī ai 'rāġhib' na us ḳhāmosh se
be-dahan ke sāmne tū be-zabāñ ho jā.egā