na haarā hai ishq aur na duniyā thakī hai
diyā jal rahā hai havā chal rahī hai
sukūñ hī sukūñ hai ḳhushī hī ḳhushī hai
tirā ġham salāmat mujhe kyā kamī hai
charāġhoñ ke badle makāñ jal rahe haiñ
nayā hai zamāna na.ī raushnī hai
are o jafāoñ pe chup rahne vaalo
ḳhamoshī jafāoñ kī tā.īd bhī hai
mire rāhbar mujh ko gumrāh na kar de
sunā hai ki manzil qarīb aa ga.ī hai
'ḳhumār'-e-balā-nosh ki tū aur tauba
tujhe zāhidoñ kī nazar lag ga.ī hai