vo paas kyā zarā sā muskurā ke baiTh gayā

maiñ is mazāq ko dil se lagā ke baiTh gayā

jab us kī bazm meñ dār-o-rasan kī baat chalī

maiñ jhaT se uTh gayā aur aage aa ke baiTh gayā

daraḳht kaaT ke jab thak gayā lakaḌ-hārā

to ik daraḳht ke saa.e meñ jā ke baiTh gayā

tumhāre dar se maiñ kab uThnā chāhtā thā magar

ye merā dil hai ki mujh ko uThā ke baiTh gayā

jo mere vāste kursī lagāyā kartā thā

vo merī kursī se kursī lagā ke baiTh gayā

phir us ke ba.ad ka.ī log uTh ke jaane lage

maiñ uTh ke jaane kā nusḳha batā ke baiTh gayā