sabā ye bārgah-e-husn meñ ḳhabar karnā

use to chāhiye zarroñ ko bhī qamar karnā

meñ chāhtā huuñ ta.alluq ke darmiyāñ parda

vo chāhtā hai mire haal par nazar karnā

mire ḳhudā mirī duniyā hī ḳhatm kar denā

agar duāoñ ko merī tū be-asar karnā

ye dekh lenā mohalle ke log kaise haiñ

phir is ke ba.ad hī ta.amīr apnā ghar karnā

tumhārā kaam hai kīchaḌ uchhālnā lekin

hamāre zarf meñ shāmil hai darguzar karnā

mirī hayāt se hai pyaar is liye 'ājiz'

vo chāhtā hai mirī umr muḳhtasar karnā