shauq ke hāthoñ ai dil-e-muztar kyā honā hai kyā hogā
ishq to rusvā ho hī chukā hai husn bhī kyā rusvā hogā
husn kī bazm-e-ḳhās meñ jā kar is se ziyāda kyā hogā
koī nayā paimāñ bāñdheñge koī nayā va.ada hogā
chāragarī sar āñkhoñ par is chāragarī se kyā hogā
dard ki apnī aap davā hai tum se kyā achchhā hogā
vā.iz-e-sāda-lauh se kah do chhoḌe uqbā kī bāteñ
is duniyā meñ kyā rakkhā hai is duniyā meñ kyā hogā
tum bhī 'majāz' insān ho āḳhir laakh chhupāo ishq apnā
ye bhed magar khul jā.egā ye raaz magar ifshā hogā