kamāl-e-ishq hai dīvāna ho gayā huuñ maiñ
ye kis ke haath se dāman chhuḌā rahā huuñ maiñ
tumhīñ to ho jise kahtī hai nāḳhudā duniyā
bachā sako to bachā lo ki Dūbtā huuñ maiñ
ye mere ishq kī majbūriyāñ ma.āz-allāh
tumhārā raaz tumhīñ se chhupā rahā huuñ maiñ
is ik hijāb pe sau be-hijābiyāñ sadqe
jahāñ se chāhtā huuñ tum ko dekhtā huuñ maiñ
batāne vaale vahīñ par batāte haiñ manzil
hazār baar jahāñ se guzar chukā huuñ maiñ
kabhī ye zom ki tū mujh se chhup nahīñ saktā
kabhī ye vahm ki ḳhud bhī chhupā huā huuñ maiñ
mujhe sune na koī mast-e-bāada-e-ishrat
'majāz' TuuTe hue dil kī ik sadā huuñ maiñ