ragoñ meñ zahr kā nashtar chubho diyā maiñ ne
na raas aayā jo hañsnā to ro diyā maiñ ne
kahīñ pe koī mirā aks hī nahīñ miltā
kis intishār meñ ḳhud ko Dubo diyā maiñ ne
tum apne ḳhvāb kī āñkhoñ pe haath rakh lenā
matā-e-jāñ kī tamannā to kho diyā maiñ ne
vo roz merī anā ko zalīl kartā thā
use bhī apne lahū meñ Dubo diyā maiñ ne
tumhāre naam jo dil ke varaq pe raushan thā
vo ek harf-e-aqīdat bhī dho diyā maiñ ne