āh-o-fariyād se ma.amūr chaman hai ki jo thā

mā.il-e-jaur vahī charḳh-e-kuhan hai ki jo thā

husn pābandī-e-ādāb-e-jafā par majbūr

ishq āvāra sar-e-koh-o-daman hai ki jo thā

laakh badlā sahī mansūr kā ā.īn-e-hayāt

aaj bhī silsila-e-dār-o-rasan hai ki jo thā

Dar ke chauñk uThtī haiñ ḳhvāboñ se navelī kaliyāñ

ḳhanda-e-gul meñ vahī sāz-e-mehan hai ki jo thā

shabnam-afshānī-e-gulshan hai dam-e-sub.h hanūz

lāla-o-gul pe vo ashkoñ kā kafan hai ki jo thā

dil-e-be-tāb pe maazī kī navāzish hai vahī

shab-e-mahtāb pe yādoñ kā gahan hai ki jo thā

haath rakh detā hai shāne pe tasavvur un kā

ġham kī rātoñ meñ koī jalva-figan hai ki jo thā

unheñ kyā fikr ki pūchheñ dil-e-bīmār kā haal

be-niyāzāna vo andāz-e-suḳhan hai ki jo thā

laakh badlā sahī ai 'fauq' zamāna lekin

tere andāz meñ be-sāḳhta-pan hai ki jo thā