haqīqat meñ koī kahānī milā do
bahut aag hai thoḌā paanī milā do
yahī dā.imī mashġhalā hai hamārā
na.ī chiiz le lo purānī milā do
mohabbat faqat lafz thā ek ḳhālī
ye kis ne kahā thā ma.ānī milā do
mujhe niiñd se koī ranjish nahīñ hai
agar ḳhvāb kuchh āsmānī milā do
sitamgar kī tāqat isī se baḌhegī
tahammul meñ tum be-zabānī milā do
na jaane ḳhudā ko ye sūjhī kahāñ se
azal-rūh meñ jism-e-fānī milā do
chalo dostoñ ko ham aaj āzmā.e
'navā' baat meñ haq-bayānī milā do