maiñ bām-o-dar pe jo ab saa.eñ saa.eñ likhtā huuñ
tamām shahar kī saḌkoñ kī raa.eñ likhtā huuñ
tavīl galiyoñ meñ ḳhāmoshiyāñ ugī haiñ magar
har ik darīche pe jā kar sadā.eñ likhtā huuñ
safed dhuup ke tuude hī jan pe girte haiñ
inhī udaas gharoñ kī kathā.eñ maiñ likhtā huuñ
havā ke dosh pe raqsāñ nahīf pattoñ par
badalte mausamoñ kī ittilā.eñ likhtā huuñ
maiñ jhuñjhlāhaToñ par zabt kar nahīñ saktā
saḌak pe chalte hue daa.eñ baa.eñ likhtā huuñ
tire ḳhulūs ne mujh se vo dushmanī kī hai
tire liye to maiñ ab bad-duā.eñ likhtā huuñ