libās-e-gul meñ vo ḳhushbū ke dhyān se niklā

mirā yaqīn bhī vahm-o-gumān se niklā

hamāre saath hī ab āñdhiyāñ bhī chaltī haiñ

ye tarz-e-ham-safarī bādbān se niklā

kuchh is tarah se bañdhe haiñ zamīñ kī Dor se ham

ki ḳhauf-e-gum-rahī ūñchī uḌaan se niklā

naqīb meñ DhūñDh rahā thā fasīl-e-shab meñ magar

mirā ġhanīm mire hī makān se niklā

ab is ke ba.ad koī rāsta na koī safar

qadam hisār-e-zamān-o-makān se niklā

ajiib kashmakash-e-jabr-o-iḳhtiyār rahī

ġham-e-hayāt isī darmiyān se niklā

nadī se pyaas milī hai isī gharāne ko

ki jis ke vāste paanī chaTān se niklā