raat hai shahr-e-butāñ hai aur ham
ārzū-e-be-karāñ hai aur ham
kaun guzrā hai sar-e-rāh-e-ḳhayāl
duur tak ik kahkashāñ hai aur ham
raat kī Dhaltī javānī ke rafīq
sirf ik pīr-e-muġhāñ hai aur ham
bujh chale haiñ saare yāroñ ke charāġh
ab charāġhoñ kā dhuāñ hai aur ham
har zamāne meñ milī haq ko salīb
ye qamīs-e-ḳhūñ-chakāñ hai aur ham
be-sutūñ taqdīr-e-har-farhād hai
ik mazāq-e-ḳhusravāñ hai aur ham
jis meñ jur.at ho vo muḌ kar dekh le
ek umr-e-rā.egāñ hai aur ham