le chalo mujh ko us ā.īna-e-ruḳhsār ke paas
ḳhaak us ziist pe jo yaar na ho yaar ke paas
nargis-e-chashm kā mat rakh dil-e-ranjūr ḳhayāl
ya.anī bīmār ko rakhte nahīñ bīmār ke paas
sar mirā tan se agar duur kiyā sar sadqe
rakhiyo qātil to mujhe apnī hī dīvār ke paas
chashm-e-mast us kī se āḳhir ko hoī ham bhī ḳharāb
hai yahī us kī sazā baiThe jo mai-ḳhvār ke paas
yuuñ ḳhayāl us kā sar-afrāz kare hai 'mārūf'
shah qadam-ranja kare juuñ kasū nādār ke paas