shahr se jab bhī koī shahr judā hotā hai

har taraf naqshe pe kohrām bapā hotā hai

roz ik baaġh guzartā hai isī raste se

roz kashkol meñ ik phuul dharā hotā hai

zaḳhm aur peḌ ne ik saath duā māñgī hai

dekhiye pahle yahāñ kaun harā hotā hai

ek duuje ko kabhī jaan nahīñ paa.e ham

maiñ nayā hotā huuñ yā ḳhvāb nayā hotā hai

maiñ sunā aayā huuñ kal raat use apnī kathā

jaane ab yaar kī dīvār kā kyā hotā hai