maiñ ne logoñ ko na logoñ ne mujhe dekhā thā
sirf us raat añdheroñ ne mujhe dekhā thā
pūchhtā phirtā huuñ maiñ apnā pata jañgal se
āḳhirī baar daraḳhtoñ ne mujhe dekhā thā
yūñhī in āñkhoñ meñ rahtī nahīñ sūrat merī
āḳhir us shaḳhs ke ḳhvāboñ ne mujhe dekhā thā
is liye kuchh bhī salīqe se nahīñ kar paatā
ghar meñ bikhrī huī chīzoñ ne mujhe dekhā thā
Dūbte vaqt bachāne nahīñ aa.e lekin
yahī kaafī hai ki apnoñ ne mujhe dekhā thā