terā hī maiñ gadā huuñ merā tū shaah bas hai

mujh shab kī raushnī kuuñ tujh ruḳh kā maah bas hai

surma se gard-e-mizhgāñ saf bāñdh ke biThī haiñ

shāh-e-nayan kuuñ terī yū qibla-gāh bas hai

dil kī shikastagī suuñ paayā huuñ bādshāhī

karne kuuñ sarvarī ke aisī kulāh bas hai

mahshar ke ḳhur kī tap siiñ kuchh Dar nahīñ haman kuuñ

zulf-e-siyah kā saaya dil kī panāh bas hai

do jā nahīñ hai jag meñ maujūd juz ḳhudā ke

is baat kī shahādat ik lā-ilāh bas hai

'yakrū' huā hai paanī sun 'ābrū' kā misra.a

''rakhne ko yūsufāñ ke ik dil kī chaah bas hai''