ik harā jazīra bhī pāniyoñ se aage hai
us kī diid kī saa.at rat-jagoñ se aage hai
kaun se manāzir meñ us ko DhūñDne nikleñ
vo gumān se haT kar hairatoñ se aage hai
bādbān kī āñkheñ ḳhvāb kaun sā dekheñ
kaun ik kinārā sā sāhiloñ se aage hai
aks jhilmilāte haiñ ek sabz qarye ke
jo jale daraḳhtoñ ke jañgaloñ se aage hai
naam kiyā likheñ us kā sab hurūf us ke haiñ
kyā use tarāsheñ vo ḳhvāhishoñ se aage hai
kaun sī ḳhalāoñ meñ kis ufuq ko jaate ho
jo qadam uThāte ho manziloñ se aage hai