kyā jāniye kyā hai had-e-idrāk se aage

bas ḳhaak hai is terī mirī ḳhaak se aage

hai shor-e-fuġhāñ ḳhāmushī-e-marg ke pīchhe

ik tez havā hai ḳhas-o-ḳhāshāk se aage

ham dekhte haiñ aañkh meñ sahme hue aañsū

ik chup hai kahīñ ḳhanda-e-be-bāk se aage

ik rañg sā hai rañg-e-tamannā se mumāsil

ik abr sā hai dīda-e-nam-nāk se aage

maiñ apne kisī ḳhvāb kī muñh-zor havā meñ

aksar hī nikal jaatā huuñ aflāk se aage

kyā shor kareñ girya-e-usshāq se baḌh kar

kyā zor kareñ pairhan-e-chāk se aage