muuñd kar āñkheñ talāsh-e-bahr-o-bar karne lage

log apnī zaat ke andar safar karne lage

māñjhiyoñ ke giit sun kar aa gayā dariyā ko josh

sāhiloñ pe raqs tezī se bhañvar karne lage

baḌh gayā hai is qadar ab surḳh-rū hone kā shauq

log apne ḳhuun se jismoñ ko tar karne lage

bāñdh de shāḳhoñ se tū miTTī ke phal kāġhaz ke phuul

ye taqāzā raah meñ ujḌe shajar karne lage

gaañv meñ kachche gharoñ kī qīmateñ baḌhne lagīñ

shahr se naql-e-makānī ahl-e-zar karne lage

jaise har chehre kī āñkheñ sar ke pīchhe aa lagīñ

sab ke sab ulTe hī qadmoñ se safar karne lage

ab paḌhe-likkhe bhī 'sājid' aa ke bekārī se tañg

shab ko dīvāroñ pe chaspāñ poster karne lage