chhup gayā yaar ḳhud-numā ho kar
rah ga.ī chashm-e-shauq vā ho kar
be-qarāroñ se un ko sharm aa.ī
shoḳhiyāñ rah ga.iiñ hayā ho kar
kyā kahūñ kyā hai mere dil kī ḳhushī
tum chale jāoge ḳhafā ho kar
ruuTh kar un se ham kahāñ jīteñ
vo manā lete haiñ ḳhafā ho kar
phañs gayā dil to chhoḌ do ham ko
ab kahāñ jā.eñge rihā ho kar
dil se kuchh kah rahī haiñ vo āñkheñ
dekheñ kyā Thahre mashvarā ho kar
haath uThā kar talāsh-e-dil se 'hasan'
baiTh rahiye shikasta-pā ho kar