kirdār kah rahe haiñ kuchh apnī zabān meñ
kitnī kahāniyāñ haiñ isī dāstān meñ
jab aaj tak na baat mukammal huī koī
ye log bolne lage kyuuñ darmiyān meñ
barsoñ meñ kaT rahā hai yahāñ arsa-e-hayāt
sadiyāñ guzar rahī haiñ kahīñ ek aan meñ
us din ke ba.ad sochnā mahdūd kar diyā
aisā ḳhayāl ek din aayā thā dhyān meñ
hone kī intihā hai vahī aaj tak 'malāl'
jo ibtidā meñ ho gayā is ḳhāk-dān meñ