dil huā vīrāñ matā-e-chashm-e-nam jaatī rahī

rafta rafta shorish-e-tab-e-alam jaatī rahī

tujh pe kyā guzrī ki pās-e-āshiqāñ karne lagā

ya.anī ham par vo tirī mashq-e-sitam jaatī rahī

ham ko duniyā se shikāyat hai kuchh is andāz kī

thī kabhī duniyā ko jaise qadr-e-ġham jaatī rahī

mai-kada hai riñd haiñ saaqī hai daur-e-jām hai

bazm-e-jam baaqī hai ab tak shān-e-jam jaatī rahī

rah gayā siine meñ ġham āsār-e-ġham zāhir nahīñ

ġhamgusāroñ se bhī ab chashm-e-karam jaatī rahī

jis ko kahte haiñ mohabbat ho ga.ī ab rasm-e-ġhair

jis ko kahte haiñ muravvat besh-o-kam jaatī rahī