phir vahī mehrbāñ huā aa.ī
ai mirī be-charāġh tanhā.ī
bain karne lageñ na sannāTe
pāsdārān-e-gosh-o-goyā.ī
kis ne taufīq se sivā paayā
dil ne ġham aañkh ne namī paa.ī
ishq kā ajr hai dil-e-rusvā
pārsā.ī azāb-e-dānā.ī
ye usī shahr ke manāre haiñ
ai tahayyur-sarisht bīnā.ī!
chaar jānib vahī dhundalke haiñ
gumraho! phir vahī galī aa.ī
nā-sapāsoñ meñ bā-vaqār na ban
ai mirī be-viqār goyā.ī