kaun detā rahā sahrā meñ sadā merī tarah
aaj tanhā huuñ magar koī to thā merī tarah
maiñ tirī raah meñ pāmāl huā jaatā huuñ
miT na jaa.e tirā naqsh-e-kaf-e-pā merī tarah
maiñ hī tanhā huuñ faqat terī bharī duniyā meñ
aur bhī log haiñ kyā mere ḳhudā merī tarah
rañg-e-arbāb-e-razā-e-pesha mubārak ho tujhe
koī hotā hī nahīñ tujh se ḳhafā merī tarah
kis ko hāsil ho tirī chashm-e-siyah ke aage
mansab-e-silsila-e-jurm-o-ḳhatā merī tarah
āshnā kaun hai naqsh-e-qadam-e-nik.hat kā
yaad kis ko hai tire ghar kā patā merī tarah
'shāz' taarā nahīñ TuuTā koī dil TuuTā hai
raah taktā thā shab-e-ġham koī kyā merī tarah