kab mausam-e-bahār pukārā nahīñ kiyā

ham ne tire baġhair gavāra nahīñ kiyā

duniyā to ham se haath milāne ko aa.ī thī

ham ne hī e.atibār dobāra nahīñ kiyā

mil jaa.e ḳhaak meñ na kahīñ is ḳhayāl se

āñkhoñ ne koī ishq sitārā nahīñ kiyā

ik umr ke azaab kā hāsil vahīñ bahisht

do chaar din jahāñ pe guzārā nahīñ kiyā

ai āsmāñ kis liye is darja barhamī

ham ne to tirī samt ishārā nahīñ kiyā

ab hañs ke tere naaz uThā.eñ to kis liye

tū ne bhī to lihāz hamārā nahīñ kiyā