apne naale meñ gar asar hotā

qatra-e-ashk bhī guhar hotā

jin ke naame kī hai pahuñch tujh tak

kaash maiñ un kā nāma-bar hotā

dil na detā jo maiñ tujhe zālim

kyuuñ mirī jaan kā zarar hotā

phir na kartā sitam kisī pe agar

haal se mere bā-ḳhabar hotā

ḳhūn-e-ushshāq karte kyuuñ nāhaq

gar butoñ ko ḳhudā kā Dar hotā

kaam aatā maiñ ek din pyāre

rabt mujh se tujhe agar hotā

khīñchtī fauj-e-ḳhat jo husn pe teġh

siina merā hī vaañ sipar hotā

'soz' ko shauq kaabe jaane kā

hai bahut par zyāda-tar hotā

shaiḳh mānind tere us ke paas

bār-bardārī ko jo ḳhar hotā