is but-kade meñ tū jo hasīñ-tar lagā mujhe

apne hī ik ḳhayāl kā paikar lagā mujhe

jab tak rahī jigar meñ lahū kī zarā sī buuñd

muTThī meñ apnī band samundar lagā mujhe

murjhā gayā jo dil meñ ujāle kā surḳh phuul

tāroñ bharā ye khet bhī banjar lagā mujhe

ab ye batā ki ruuh ke sho.ale kā kyā hai rañg

marmar kā ye libās to sundar lagā mujhe

kyā jāniye ki itnī udāsī thī raat kyuuñ

mahtāb apnī qabr kā patthar lagā mujhe

āñkhoñ ko band kar ke baḌī raushnī milī

maddham thā jo bhī naqsh ujāgar lagā mujhe

ye kyā ki dil ke diip kī lau hī tarāsh lī

sūraj agar hai kirnoñ kī jhālar lagā mujhe

sadiyoñ meñ tai huā thā bayābāñ kā rāsta

gulshan ko lauTte hue pal bhar lagā mujhe

maiñ ne use sharīk-e-safar kar liyā 'shakeb'

apnī tarah se chāñd jo be-ghar lagā mujhe