bujhe bujhe se sharāre mujhe qubūl nahīñ
savād-e-shab meñ sitāre mujhe qubūl nahīñ
ye koh-o-dasht bhī ā.īna-e-bahār bane
faqat chaman ke nazāre mujhe qubūl nahīñ
tumhāre zauq-karam par bahut huuñ sharminda
murād ye hai sahāre mujhe qubūl nahīñ
misāl-e-mauj samundar kī samt lauT chalo
sukūñ-ba-dosh kināre mujhe qubūl nahīñ
maiñ apne ḳhuuñ se jalā.ūñgā rahguzar ke charāġh
ye kahkashāñ ye sitāre mujhe qubūl nahīñ
'shakeb' jis ko shikāyat hai khul ke baat kare
Dhake-chhupe se ishāre mujhe qubūl nahīñ