dil ke vīrāne meñ ik phuul khilā rahtā hai
koī mausam ho mirā zaḳhm harā rahtā hai
shab ko hogā ufuq-e-jāñ se tirā husn tulūa
ye vo ḳhurshīd hai jo din ko chhupā rahtā hai
yahī dīvār-e-judā.ī hai zamāne vaalo
har ghaḌī koī muqābil meñ khaḌā rahtā hai
kitnā chup-chāp hī guzre koī mere dil se
muddatoñ sabt nishān-e-kaf-e-pā rahtā hai
saare dar band hue shahr meñ dīvāne par
ek ḳhvāboñ kā darīcha hī khulā rahtā hai