kyā jāniye manzil hai kahāñ jaate haiñ kis samt
bhaTkī huī is bhiiḌ meñ sab soch rahe haiñ
bhīgī huī ik shaam kī dahlīz pe baiThe
ham dil ke sulagne kā sabab soch rahe haiñ
TuuTe hue pattoñ se daraḳhtoñ kā ta.alluq
ham duur khaḌe kunj-e-tarab soch rahe haiñ
bujhtī huī sham.oñ kā dhuāñ hai sar-e-mahfil
kyā rañg jame āḳhir-e-shab soch rahe haiñ
is lahr ke pīchhe bhī ravāñ haiñ na.ī lahreñ
pahle nahīñ sochā thā jo ab soch rahe haiñ
ham ubhre bhī Duube bhī syāhī ke bhañvar meñ
ham so.e nahīñ shab-hama-shab soch rahe haiñ