is ḳhāk-dāñ meñ ab tak baaqī haiñ kuchh sharar se
dāman bachā ke guzro yādoñ kī rahguzar se
har har qadam pe āñkheñ thiiñ farsh-e-rāh lekin
vo raushnī kā haalā utrā na baam par se
kyuuñ jāda-e-vafā par mish.al-ba-kaf khaḌe ho
is sail-e-tīrgī meñ niklegā kaun ghar se
kis dasht kī sadā ho itnā mujhe batā do
har-sū bichhe haiñ raste aa.uuñ to maiñ kidhar se
ujḌā huā makāñ hai ye dil jahāñ pe har shab
parchhā.iyāñ lipaT kar rotī haiñ bām-o-dar se